शनिबार, बैशाख ४, २०७८
प्रमुख समाचार विकास समसामयिक

चीनका राष्ट्रपतिको आज महत्वपूर्ण भेटघाट, समझदारीमा आज हस्ताक्षर हुने

काठमाडौं, २०७६ असोज २६। नेपाल भ्रमणको दोस्रो दिन चीनका राष्ट्रपति सी चिनफिङले आज १० बजेपछि प्रधानमन्त्री केपी शर्मासँग दुईपक्षीय मामिलामा भेटघाटको कार्यक्रम रहेको छ । कार्यतालिका अनुसार उनी आजै स्वदेश प्रस्थान गर्नेछन् ।

प्रधानमन्त्रीका प्रेस संयोजक चेतन अधिकारीका अनुसार प्रधानमन्त्री ओली करिब १० बजेतिर होटल सोल्टीमा पुग्नेछन् । दुईपक्षीय भेटपछि दुई देशका अधिकारीहरुबीच विभिन्न विषयमा समझदारीमा हस्ताक्षर हुने कार्यक्रम रहेको छ । नेपालका राष्ट्रपति विद्यादेवी भण्डारीले राष्ट्रपति सीको सम्मानमा शनिबार राति आयोजना गरेको रात्रीभोजका क्रममा सीले नेपाललाई भूपरिवेष्ठित मुलुकबाट भूजडित बन्न चीनले सघाउने बताएका थिए ।

उनले सीमापार रेलमार्ग र केरुङ-काठमाडौं सुरुङ मार्ग निर्माणका लागि चीन प्रतिबद्ध रहेको समेत जनाएका थिए । रेलमार्गको बारेमा अध्ययन गरिने संकेत चीनले दिएको छ भने सुरुङ्ग मार्गका लागि पनि सहयोगको वचन दिएको छ । त्यसैगरी अन्य केही समझदारीमा पनि हस्ताक्षर हुने कार्यक्रम रहेको छ । आफूले विभिन्न महत्वपूर्ण विषयमा आज प्रधानमन्त्री ओलीसँग कुरा गर्ने चीनका राष्ट्रपतिले शनिबार साँझको सम्बोधनका क्रममा बताएका थिए ।

सो अवसरमा नेपालका राष्ट्रपति भण्डारीले पनि नेपाली जनता चीनसँग रेलबाट जोडिन चाहेको भनेर चिनियाँ राष्ट्रपतिलाई झकझकाउने प्रयास गरेकी थिइन् ।

राष्ट्रपति सीले शनिबार राष्ट्रपति भण्डारीसँग दुईपक्षीय कुराकानी गरेका थिए भने नेपाली कांग्रेसका सभापति शेरबहादुर देउवासँग पनि कुराकानी गरेका थिए । त्यसपछि उनी रात्रिभोजमा सहभागी भएका थिए । आज नेकपाका अर्का अध्यक्ष पुष्पकमल दाहाल प्रचण्डसँग पनि सीको कुराकानी होटल सोल्टीमा नै हुने कार्यक्रम छ ।

यसैगरी चिनियाँ राष्ट्रपति सी चिनफिङले विश्वविद्यालयका क्षेत्रमा पनि सहयोग गर्न तथा सुविधा विस्तार गर्न चीन तयार रहेको बताउँदै नेपालीको जीवनस्तर उकास्नका लागि सन् २०२० देखि २०२२ सम्मका लागि ३।५ अर्ब आरएमबी उपलब्ध गराइने जानकारी दिएका छन् ।

भिडियो

रुपेश बागचन् “आलुडन”को तीजको गीत “सारी झरे झर्ला”

ताजा समाचारहरू